Бабруйскі Кулібін распавёў, як сабраў электрычны ровар
20- 27.10.2018, 14:00
- 20,751
Абслугоўванне электраровараў каштуе прыкладна паўтара рубля штомесяц.
Георгій Бельскі - вынаходнік на пенсіі. Спадару 84 гады, ён мае некалькі патэнтаў на унікальныя вынаходкі, а надоечы сабраў электрычны ровар паводле ўласных рысункаў, піша «Вячэрні Бабруйск».
Свой агрэгат з пярэднім рухачом спадар Георгій сабраў на раме звычайнага ровара. Да гэтага ягамосць бачыў трохколавыя электрычныя ровары і ў інтэрнэце, і жыўцом. Яму захацелася зрабіць нешта самому, прычым так, каб можна было катацца па ўсякіх дарогах.
Матор купіў у інтэрнэт-краме. Да яго ў камплекце ішлі акумулятар, кантролер, сілкавальная прылада, тронкаў гамавальніка і газу, усё каштавала 750 рублёў. Сігнал перадаецца ад кантролера на матор-кола магутнасцю 500 ватаў.
Усё працуе, са слоў спадара, вельмі проста: ад акумулятара электраэнэргія перадаецца на пярэдняе кола, на якім стаіць рухавік. Усім працэсам кіруе кантролер.
Ладунку акумулятара стае на 35-40 кіламэтраў. Разагнацца такая тэхніка можа да 45 км/гадзіну. Пенсіянер распавёў, што для яго выгодная хуткасць - прыкладна 25 км/г.
На адмысловым дысплеі на стырне паказваецца ступень наладавання акумулятара. Асобна спадар замацаваў на стырне роварны кампутар, які паказвае пройдзены шлях і бягучую хуткасць.
- Сёлета наездзіў ужо паўтары тысячы кіламэтраў, ездзіў і па снезе, і па лёдзе, ужо дзве зімы так ад’ездзіў, - падзяліўся сп.Георгій.
На гэтым праца над электрычным ровары не скончылася. Для большай зручнасці ён абсталяваў яго канструкцыяй з рысор, спружын-амартызатараў і двух дадатковых 20-цалевых колаў на восі. За кошт такой рухомай канструкцыі ровар не заносіць нават на вельмі дрэнных дарогах.
Канструкцыя сабраная на падставе рысункаў, гэта асабістая распрацоўка пенсіянера, але ён гатовы падзяліцца ёю, калі знойдуцца ахвочыя.
- Паводле маіх рысункаў ужо адзін чалавек сабраў электрычны ровар. Мужчына спыніў мяне на вуліцы, стаў распытваць, што і як. У выніку мы пазнаёміліся, я дапамог яму ў зборцы, - распавёў Георгій.
Бельскі ўпэўнены - чым больш электрычнага транспарту будзе ў горадзе, тым чысцейшае будзе паветра і здаравейшыя людзі. Спадар Георгій абураецца:
- Паглядзіце, колькі самаходаў ездзіць. Сярэдняя вага аўто - тона трыста. А ў кожным - толькі адзін чалавек. Я меў самаход, але я ўсё жыццё на працу ездзіў на ровары.
Сп.Георгій мяркуе, што за электрычным транспартам - будучыня, пагатоў у Беларусі неўзабаве ўвядуць у дзеянне першы блок АЭС, і з электраэнэргіяй праблем не будзе.
Для большай зручнасці мужчына цалкам прыбраў з ровара панажы, а замест іх змайстраваў металічныя прыступкі, якія засланіў спецыяльнымі пырскавікамі.
Сядло ровара вынаходнік таксама перарабіў. Сам сабраў больш выгоднае - шырокі драўляны каркас абцягнуў скурай і набіў напаўняльнікам.
Каб зручней было перавозіць рэчы, прыбудаваў замест стандартнага багажніка вялікі кошык. На дне, пад вечкам, Георгій заўсёды возіць патрэбнае начынне.
- Уся канструкцыя, з улікам кошту ровара, каштавала прыкладна 580 даляраў, а трохколавыя электраровары могуць каштаваць і ў два разы даражэй, - падлічыў пенсіянер.
Са слоў спадара Георгія, рэгістраваць у ДАІ такі ровар не трэба, і пасведчанне кіроўцы не спатрэбіцца. Захоўваць яго можна дзе хочаш, ён, да прыкладу, трымае ў сутарэнні дома.
Абслугоўванне электрычных ровараў каштуе прыкладна паўтара рубля штомесяц (на гэтую суму Георгій ацаніў электраэнэргію для сілкавання акумулятара).
Трохі пра вынаходніка
Георгій Бельскі працаваў на Бабруйскім машынабудаўнічым заводзе з 1957 да 2000 года. Быў начальнікам аддзела механізацыі і аўтаматызацыі. Вынаходзіў сур'ёзныя машыны і станкі. Хоць першае ягонае вынаходніцтва ніяк з прамысловасцю не было звязанае: спадар сканструяваў самавызваляны якар для рыбнай лоўлі з лодкі.
Апараты сп.Георгія, паводле ягоных слоў, працуюць на заводзе дагэтуль - гэта станок для электракантактнай апрацоўкі і фармовачная машына. Гэтыя вынаходкі ён таксама запатэнтаваў.
Пенсіянер распавёў - за савецкім часам ён браў тры тысячы рублёў на год за тое, што ягоныя патэнты выкарыстоўваюцца.