Урад РФ абвінаваціў дрэннае надвор'е ў рэзкім запаволенні эканомікі

Пра гэта заявіў міністр эканамічнага развіцця РФ.

Прычынай рэзкага запаволення расейскай эканомікі, рост якой у трэцім квартале склаў усяго 1,3%, а ў верасні і жніўні і зусім ледзь перавысіў 1%, стала сельская гаспадарка, паведамляе finanz.ru.

Пра гэта, як паведамляе ТАСС, заявіў у сераду кіраўнік МЭР Максім Арэшкін.

У жніўні вытворчасць сельгаспрадукцыі абвалілася на 10,8% у параўнанні з 2017 годам. У верасні падзенне замарудзілася, але ўсё ж склала адчувальныя 6%.

«Праблемы з ураджаем аказалі сур'ёзны негатыўны ўплыў на лічбы ВУП», - заявіў Арэшкін.

«Па трэцяму кварталу - гэта мінус 0,5 адсоткавага пункта, гэта значыць без уліку сельскай гаспадаркі ВУП да трэцяга кварталу рос бы не на 1,3%, а на 1,8%», - падкрэсліў міністр. Гэта адпавядае прагнозу МЭР, які чакае росту на 1,8% паводле вынікаў года.

Калі б не правал у сельскай гаспадарцы, то прагноз выконваўся б і паводле вынікаў 9 месяцаў: фактычны рост склаў 1,6%, а мог бы - 1,8%, запэўніў Арэшкін.

Фактычна кіраўнік МЭР абвінавачвае ў запаволенні эканомікі дрэннае надвор'е. Менавіта яно стала прычынай рэзкага скарачэння ўраджаю ў ключавых рэгіёнах, паказвае кіраўнік аналітычнага цэнтра Савэкон Андрэй Сізоў.

Так, у Паволжы збор пшаніцы ўпаў на 34% праз сухое надвор'е ў вяснова-летні перыяд.

«Непагадзь адбілася і на іншых рэгіёнах», - адзначае Сізоў: запасы збожжа імкліва скарачаюцца амаль ва ўсіх рэгіёнах - у верасні яны недацягваюць да леташніх 10%.

Так, у Растоўскай і Варонежскай абласцях запасы ўпалі на 22%, у Стаўрапольскім краі і Курскай вобласці - на 11%.