Еўрапарламент прапаноўвае прызначыць спецпрадстаўніка ЕЗ у пытаннях Крыма і Данбаса
2- 24.10.2018, 19:34
- 8,201
Пра гэта гаворыцца ў праекце рэзалюцыі аб сітуацыі ў Азоўскім моры.
Еўрапарламент прапаноўвае прызначыць спецыяльнага прадстаўніка ЕЗ у пытаннях Крыма і Данбаса.
Пра гэта гаворыцца ў праекце рэзалюцыі пра сітуацыю ў Азоўскім моры, піша «Укрінформ».
«Еўрапарламент заклікае высокага прадстаўніка ЕЗ - віцэ-прэзідэнта Еўракамісіі старанна адсочваць развіццё сітуацыі з бяспекай у Азоўскім моры, улічваючы рост магчымасці патэнцыйнага канфлікту ў Еўропе, што будзе мець вялікія наступствы для бяспекі, якія наўпрост закрануць ЕЗ і краіны-сябраў. У сувязі з гэтым ЕП уважае, што найбольш эфектыўным будзе прызначэнне спецыяльнага пасланніка ЕЗ у Крыме і рэгіёне Данбаса, які таксама будзе адказным за Азоўскае мора», - гаворыцца ў праекце дакумента.
Еўрапарламентарыі таксама заклікалі высокую прадстаўніцу ЕЗ у замежных справах і палітыцы бяспекі Федэрыку Магерыні выступіць з прапановай пра пашырэнне мандата Спецыяльнай маніторынгавай місіі АБСЕ ва Украіне на назіранне за сітуацыяй у Азоўскім моры.
Галасаванне аб рэзалюцыі запланаванае на чацвер.
Шэсць месяцаў таму Расея ўвяла новы рэжым інспекцый суднаў, якія кіруюцца з або ва ўкраінскія парты ў Азоўскім моры. Гэта прывяло да значных затрымак і павелічэння выдаткаў з боку ўкраінскіх экспарцёраў і судоў, якія курсуюць пад сцягамі краін ЕЗ.
Адначасова Расея пачала перакідку вайсковых суднаў у Азоўскае мора ў вялікай колькасці, і Украіна адказала нарошчваннем вайсковых магутнасцяў.