Саудаўскія чыноўнікі не дазволілі абшукаць студню ў консульстве ў Стамбуле

Раней заяўлялася, што цела журналіста знаходзіцца менавіта ў калодзежы на тэрыторыі консульства.

Улады Саудаўскай Арабіі не дазволілі турэцкай паліцыі абшукаць студню ў садзе саудаўскага генконсульства ў Стамбуле ў рамках расследавання забойства журналіста Джамаля Хашогі.

Пра гэта паведаміла дзяржаўнае турэцкае агенцтва Anadolu, піша «Европейская правда».

Турэцкія праваахоўнікі раней супольна з саудытамі правялі ператрусы ў консульстве і ў рэзідэнцыі генеральнага консула. Хашогі знік у будынку генконсульства 2 кастрычніка. Пасля гэтага яго ніхто не бачыў.

Старшыня турэцкай апазіцыйнай партыі «Радзіма» Догу Перынчэк напярэдадні заявіў, што фрагменты цела забітага саудаўскага журналіста Джамаля Хашогі знайшлі ў калодзежы на тэрыторыі генконсульства ў Стамбуле. Афіцыйна гэтая інфармацыя не была пацверджаная.