Стала вядома, якім будзе надвор'е да канца тыдня

На большай частцы тэрыторыі краіны дажджы і вецер.

25 кастрычніка ўначы надвор'е Беларусі будзе вызначаць тылавая частка цыклону з цэнтрам над Валагодскай вобласцю Расеі, удзень адаб'ецца ўплыў атмасферных франтоў. Чакаецца воблачна з прасвятленнямі, піша pogoda.by.

На большай частцы тэрыторыі кароткачасовыя дажджы. Вецер паўночна-заходні, удзень з пераходам на паўднёва-заходні, парывісты; уначы і раніцай на паўднёвым захадзе рэспублікі моцны, парывісты. Тэмпература паветра мінімальная ўначы 0..+5°С, максімальная - у сярэдзіне дня +3..+9°С. Атмасферны ціск уначы будзе расці, удзень - падаць.

26 кастрычніка надвор'е будзе вызначаць няўстойлівая і халодная паветраная маса, якая паступае з Балтыйскага мора. У многіх раёнах пройдуць кароткачасовыя ападкі (дождж, на паўночным усходзе з мокрым снегам). Уначы і раніцай месцамі згусціцца слабы туман. Вецер заходняй чвэрці сярэдні, уначы на паўднёвым захадзе краіны парывісты. Тэмпература паветра мінімальная ўначы ад -3°С на паўночным усходзе да +6°С на паўднёвым захадзе, максімальная - удзень +3..+10°С.

27 кастрычніка праз тэрыторыю Беларусі будуць праходзіць атмасферныя франты. Пераважна ў паўночных і цэнтральных раёнах рэспублікі чакаюцца кароткачасовыя дажджы, уначы і раніцай на паўночным усходзе з мокрым снегам. Вецер заходняй чвэрці сярэдні, раніцай і ўдзень месцамі моцны парывісты. Тэмпература паветра мінімальная ўначы ад -2°С на ўсходзе краіны да +6°С на захадзе, максімальная – удзень ад +5°С на поўначы да +13°С на поўдні.