Польшча прысвоіла Алегу Сянцову ўзнагароду «За чалавечую годнасць»
1- 23.10.2018, 16:53
- 6,671
Узнагароду Pro Dignitate Humana заснавалі ў Польшчы ў 2012 годзе.
У Польшчы вызначылі прысвоіць украінскаму палітвязню ў Расеі рэжысёру Алегу Сянцову ўзнагароду Pro Dignitate Humana. Як піша liga.net, пра гэта 23 кастрычніка заявіў міністр замежных спраў Польшчы Яцэк Чапутовіч падчас сустрэчы з Паўлам Клімкіным, паведамляецца ў ягоным Twitter.
«Польшча прыняла пастанову прысвоіць Алегу Сянцову ўзнагароду Pro Dignitate Humana», - заявіў Чапутовіч.
Са слоў польскага дыпламата, Польшча будзе падтрымліваць Украіну ў супрацьдзеянні расейскай агрэсіі і не прызнае нелегальную анэксію Расеяй Крыма.
Украінскі міністр замежных спраў Клімкін падзякаваў Польшчы за высокую ўзнагароду для Сянцова.
Клімкін таксама выказаў перакананне, што разам з Чапутовічам неўзабаве паглядзіць у Варшаве новы фільм Сянцова і пагутарыць з ім асабіста на прэм'еры.
Узнагароду Pro Dignitate Humana («За чалавечую годнасць») заснавалі ў Польшчы ў 2012 годзе. Узнагароду прысуджаюць за самаадданую і бескампрамісную дзейнасць у абарону правоў асоб, якія зазнаюць пераслед і рэпрэсіі, за непахісную пазіцыю ў абароне правоў асобы і павагі да чалавечай годнасці.