«Заўсёды ёсць імавернасць, што табе не заплацяць»

Баранавіцкі фатограф распавёў пра плюсы і мінусы сваёй працы.

Фатограф Анатоль Несцярук распавёў Intex-press, з чаго пачынаў, чаму праца фатографа не такая простая, як здаецца, колькі сродкаў уклаў у тэхніку і ці задаволены заробкам.

Фатаграфіяй я захапляўся яшчэ ў школе. Але тады і падумаць не мог, што калі-небудзь здымкі стануць справай майго жыцця. Гадоў у 20 назапасіў на першы добры фотаапарат - айчынны «Зеніт». Каштаваў ён тады 120 рублёў - мой заробак за некалькі месяцаў. Потым пашчасціла набыць два выдатныя патрыманыя аб'ектывы: на новыя грошай не было.

Ранішнікі і школьныя альбомы

Неяк сябар, у якога быў досвед здымак у школах і дзіцячых садках, прапанаваў мне папрацаваць разам. Я пагадзіўся. У той час фотаапараты былі на вагу золата і такія здымкі карысталіся попытам.

Потым сталі рабіць школьныя выпускныя альбомы. Гэта стала прыносіць прыбытак. Праўда, не такі добры, як мы разлічвалі. Адно фота тады каштавала ад 50 цэнтаў да 1 даляра. Здавалася б, можна было азалаціцца (заробкі ў той час былі па 8-10 даляраў). Але ў рэальнасці 2 даляры каштавала плёнка, за друк адной фатаграфіі мы аддавалі - 15-20 цэнтаў, праяўка - 1-2 даляры - у выніку прыбытку выходзіла цэнтаў 30-40. Але мяне гэта задавальняла. Больш за тое, пасля 10 гадоў працы настаўнікам МХК я звольніўся і цалкам прысвяціў сябе фатаграфіі.

Рэклама і рэкамендацыі

Заняць сваю нішу 20 гадоў таму было прасцей, чым цяпер: не было такой канкурэнцыі. Аднак і тады рэклама адыгрывала немалую ролю. Гэта цяпер я актыўна выкарыстоўваю сацсеткі: патэнцыйныя кліенты бачаць працы і могуць зразумець, падыходзіш ты ім ці не. Важнай рэкламай было і застаецца сарафаннае радыё. Нават сёння частка кліентаў прыходзіць да мяне на рэкамендацыі знаёмых.

Кліенты не змяніліся

Запыты кліентаў з гадамі мала змяніліся. Cамымі папулярнымі па-ранейшаму застаюцца вясельныя здымкі. Але цяпер больш актыўна заказваюць індывідуальныя і сямейныя фотасеты. Падставы розныя: дні нараджэння дзяцей, юбілей бацькоў, гадавіны вяселля, вясна, лета, прыезд сваякоў і г.д. Жанчыны здымаюцца часцей і з вялікім задавальненнем. Хоць, бывае, што і мужчыны, якіх жонкі сілай прывялі на здымку, у працэсе ўваходзяць у смак і потым гатовыя здымацца гадзінамі.

Ёсць імавернасць, што табе не заплацяць

Камусьці праца фатографа можа здацца простай: рабі кадры і ўсё. Напраўду яна патрабуе цярпення і ўседлівасці. Мала хто задумваецца, што апрацоўка нават адной фатаграфіі можа доўжыцца гадзінамі. Да прыкладу, у мяне былі выпадкі, калі мадэлі забывалі дома памаду або туш, і мне даводзілася фарбаваць ім вусны або вочы в фоташопе.

Яшчэ фатограф - гэта крыху псіхолаг. Бывае, людзі ў пачатку фотаздымкі баяцца ці саромеюцца і, здаецца, што фотасесія на мяжы зрыву. Пасля размовы яны разнявольваецца, атрымліваюцца выдатныя фатаграфіі.

Асобная тэма - аплата працы. Працуем мы «на сумленным слове», таму заўсёды ёсць імавернасць, што табе не заплацяць. У мяне аднойчы быў выпадак. Пасля вяселля жаніх прыйшоў забраць дыск з фотаздымкамі. Ён быў нецвярозы, мабыць, для адвагі, і з сябрамі. Бярэ дыск і аддае мне траціну дамоўленай сумы, маўляў, заробак упаў, і наогул «збіраем на аўтамабіль». Мы доўга спрачаліся, але поўную суму ён так і не аддаў... Пасля гэтага грошы я заўсёды бяру ў канцы вясельнага дня ці адразу пасля здымкі.

Давядзеца ўкласціся ў тэхніку

У працы фатографа велізарную ролю адыгрывае тэхніка. Тэхналогіі не стаяць на месцы, і свой арсенал даводзіцца ўвесь час абнаўляць. Цяпер працую з двума фотаапаратамі Canon. Але гэта далёка не ўсё. Для працы неабходна яшчэ мноства аксесуараў - аб'ектывы (каштуюць яны ўдвая даражэй, чым сам фотаапарат), успышкі, акумулятары і г.д. Акрамя таго, не абысціся без магутнага кампутара, на якім фатаграфіі апрацоўваюць. І ўсё гэта перыядычна выходзіць з ладу. У камплект, які я выкарыстоўваю ў працы, укладзена амаль 7000 даляраў. І гэта не мяжа. Таму, калі вы вызначылі стаць добрым фатографам, будзьце гатовыя да значных выдаткаў.

Мне дастаткова

Ужо 16 гадоў я займаюся фатаграфіяй і ні разу аб гэтым не пашкадаваў. Многія пытаюцца, наколькі гэта выгадна. Магу сказаць адно: мне дастаткова. Але, думаю, што стаць мільянерам наўрад ці здолею. Фатаграфія - сфера, у якой нічога нельга прадказаць. Часам за тыдзень я магу атрымаць месячны заробак рабочага на заводзе. Часам здымак можа і не быць. І да гэтага трэба быць гатовым. Калі ты хочаш быць фатографам, ты павінен любіць сваю справу, а толькі потым хацець зарабляць.