Расею адмаўляюцца далучаць да еўрапейскага аналагу SWIFT

Цэнтрабанк РФ не атрымаў запрашэння.

ЦБ РФ пакуль не атрымліваў запрашэнне далучыцца да еўрапейскага аналагу аплатнай сістэмы SWIFT. Пра гэта паведаміла кіраўніца Банка Расеі Эльвіра Набівуліна ў эфіры тэлеканала "Расія-24", піша finanz.ru.

"Мы мяркуем, што такая канцэпцыя [аналага аплатнай сістэмы SWIFT] рэалізоўная. Што да еўрапейскай [ініцыятывы] - гэта іхні праект. Мы пакуль не атрымлівалі запрашэнняў у ім паўдзельнічаць, але, калі раптам яны будуць, вядома, мы разгледзім", - сказала яна.

Кіраўніца ЦБ адзначыла, што ў Расеі ініцыятыва стварэння альтэрнатыўнай SWIFT аплатнай сістэмы ўжо рэалізаваная, а таксама падрыхтаваная тэхнічная магчымасць для прылучэння замежных контрагентаў.

"Мы маем поўны аналаг SWIFT, і гэта не проста тэарэтычная мадэль, нейкае тэставанне, гэта дзейная мадэль. У нас цяпер больш за 10% усіх фінансавых паведамленняў праходзіць праз нашу сістэму. Яна зручная, бо працуе ў такіх жа фарматах, як SWIFT. Да яе далучаныя і банкі, і маюць магчымасць прылучацца і карпарацыі, і скарбніца. Ужо тэхнічна гатовыя варыянты, калі захочуць прылучыцца замежныя ўдзельнікі", - сказала Набівуліна.

Пры гэтым як бы ні развівалася сітуацыя, пагрозы фінансавай ізаляцыі Расеі няма, падкрэсліла яна.

Нагадаем, пра патрэбу стварыць у ЕЗ незалежную ад ЗША аплатную сістэму - аналаг SWIFT - у верасні заявіў кіраўнік МЗС Германіі Гайка Маас. Ён адзначыў, што такі праект дапаможа працаваць з Іранам у варунках санкцый ЗША, якія ўваходзяць у дзеянне з пачатку лістапада.

Міністр фінансаў РФ Антон Сілуанаў, каментуючы ініцыятыву Мааса ў інтэрв'ю тэлеканалу "Расея-24", адзначаў, што РФ ахвочая далучыцца да еўра-SWIFT.