Дзе яны цяпер? Восем трэнераў, якія пакінулі клубы вышэйшай лігі Беларусі ў гэтым сэзоне

Успамінаем, хто з стырнавых быў звольнены падчас цяперашняга чэмпіянату краіны і як яны маюцца цяпер.

Pressball.by успомніў, хто з стырнавых быў звольнены падчас цяперашняга чэмпіянату краіны і як яны маюцца цяпер. Ходзіць пагалоска, што Аляксей Шпілеўскі можа аб'явіцца ў Казахстане...

Марэк Зуб ("Шахцёр")

Польскі спецыяліст узначаліў "Шахцёр" у мінулым сэзоне, змяніўшы Алега Кубарава. Калі б кіраўнікі "гарнякоў" ведалі, да чаго гэта прывядзе... Нягледзячы на лідарства ў чэмпіянаце, Кубараву не даравалі няўдачу на еўраарэне. Марэк Зуб утрымаць каманду на першым месцы не здолеў, як і знайсці агульнай мовы з гульцамі. Цікавы факт: менавіта жодзінскае "Тарпеда" Кубарава, фактычна, пахавала надзеі Салігорска на чэмпіёнства, пакінуўшы ў спрэчцы толькі менскае "Дынама" і БАТЭ.

Зрэшты, спартовы дырэктар "Шахцёра" Дзмітрый Хахлоў падтрымаў Зуба, паляк застаўся ў клубе. Аднак жа на старце новага сезону "Шахцёр" вылецеў з Кубка Беларусі, саступіўшы дарогу "Дняпру". У чэмпіянаце гульня таксама не наладзіліся: пасля трох тураў клуб займаў 14-е месца, набраўшы адзін бал. Лёс Зуба быў прадвызначаны...

Чуткі сваталі паляка ў нацыянальную каманду Латвіі, слалі на радзіму, але гетман адкрыў новую краіну - Казахстан. На пачатку жніўня ён падпісаў кантракт з "Таболам", якія знаходзіўся на трэцім месцы. Праз два з паловай месяцы месца засталося ранейшым. Да канца чэмпіянату яшчэ чатыры туры," Табол " практычна забяспечыў месца ў еўракубку - восем балаў перавагі дазваляюць пачувацца выгодна.

Пра большае марыць не даводзіцца - "Астана" і "Кайрат" уцяклі настолькі, што не засталося шанцаў не толькі на залатыя, але нават на срэбныя медалі. Аднак вынік можна лічыць паспяховым, бо так высока каманда не забіралася восем гадоў, калі здабыла першынство.

Алег Дулуб (БАТЭ)

Экс-стырнавы БАТЭ прыйшоў у каманду ў студзені, сышоўшы з адэскага "Чарнаморца". Ён змяніў Аляксандра Ермаковіча і парушыў пераемнасць, якой быў вядомы Барысаў. У чэмпіянаце БАТЭ бег, аднак саступіў берасцейскаму "Дынама" ў матчы за Супэркубак (2:3) і яму ж у фінале Кубка краіны (1:2).

Пасля васьмі запар перамог у чэмпіянаце была нічыя з " Іслаччу" (1:1), а затым параза ад" Гарадзеі " (1:2). Першая ж няўдача прычынілася да адстаўкі. Сягоння Дулуб ні з кім не звязаны кантрактнымі абавязкамі. Час ад часу сп.Алег каментуе футбольныя матчы на "Беларусь 5". Настаўнік расказаў, што для яго каментатарства - спосаб павялічыць дыяпазон магчымасцяў. Дарэчы, выходзіць няблага.

Радаслаў Латал ("Дынама-Брэст")

У параўнанні з БАТЭ, у" Дынама " вынікі былі супрацьлеглыя. Справы не наладзіліся са старту, аднак поспехі ў кубкавых матчах дазвалялі трэнеру заставацца на плаве. Латал быў звольнены пасля шасці тураў, калі каманда ішла 11-й.

Неўзабаве трэнер узначаліў чэмпіёна Славаччыны - "Спартак" з Трнавы. І ўзяў жвавы старт. У кваліфікацыі Лігі чэмпіёнаў "Спартак" прайшоў "Легію" і ледзь не выбіў з спаборніцтваў "Црвену Звезду", саступіўшы толькі ў дадатковы час. У групавым турніры Лігі Еўропы Латал мае пакуль перамогу і паразу - у квартэце з "Фэнэрбахчэ", "Андэрлехтам" і "Дынамам" з Заграба.

Аднак у чэмпіянаце Славаччыны не ручыць - пасля адзінаццаці матчаў толькі 11 балаў. Каманда размяшчаецца на дзявятым месцы і ставіць мэту трапіць у шасцёрку. У Славаччыне дзейнічае знаёмая беларусам сістэма падзелу на шасцёркі.

Аляксей Шпілеўскі ("Дынама-Брэст")

У Брэсце Латала змяніў Аляксей Шпілеўскі. У Нямеччыне ён трэнаваў дубль "Ляйпцыга" і ў Беларусі быў малавядомы. У 2011-м Шпілеўскі атрымаў трэнерскую ліцэнзію катэгорыі "А", стаўшы ў Нямеччыне самым маладым яе ўладальнікам.

Падчас сэзону клуб пакінулі капітан Гаўрыловіч і лідар нападу Мілеўскі, пасля чаго для стырнавога пачаўся зваротны адлік. Вынікі, атмасфера ў раздзявальні і нарастанне негатыву вымусілі кіраўніцтва расстацца са Шпілеўскім. З тых часоў малады трэнер знаходзіцца без працы. Праўда, ходзіць пагалоска, што Шпілеўскі можа ўзначаліць казахстанскі "Кайрат", які надоечы расстаўся з гішпанцам Карласам Алосам. Клуб знаходзіцца на другім месцы, наперадзе толькі "Астана". Да вяршыні дзесяць балаў, за чатыры туры такое адставанне не адквітаць.

Вячаслаў Гярашчанка ("Гомель")

Адна з першых адставак у сэзоне адбылася ў Гомелі. Яшчэ падчас мінулага чэмпіянату Гярашчанка быў ахвочы напісаць заяву з уласнага жадання, але яго ўпрасілі застацца. Аднак 14-е месца пасля пяці тураў новага першынства не тое, на што спадзяваліся заўзятары. Напэўна, адна з рэдкіх трэнерскіх адставак у гэтым спісе, пасля якой не стала горш. Без Гярашчанкі "Гомель" выдаў шасціматчавую сэрыю без параз. Цяпер "зялёныя" ў сярэдзіне табліцы, а экс-стырнавы каманды без клуба.

Вячаслаў Ляўчук ("Дняпро")

"Дняпро", пра што вышэй, пачаў сэзон з кубкавай перамогі над "Шахцёрам", але ў чэмпіянаце працягу не было. Пасля разгромнай паразы (0:5) ад "Слуцка" трэнер падаў у адстаўку. Яе не прынялі, але супрацоўніцтва доўжылася яшчэ толькі два туры. У Магілёў прыехала менскае "Тарпеда". Гаспадары вялі ў ліку, але "чорна-белыя" адквіталіся ў канцы і здабылі перамогу.

Цяпер Ляўчук узначальвае рэчыцкі "Спадарожнік" (Д3). Каманда знаходзіцца на 4-м месцы, але практычна няма шанцаў, што ў наступным сэзоне калектыў апынецца ў першай лізе. "Рух" і "Крумкачы" недасягальныя.

Сяргей Кабельскі і Леанід Лагун ("Тарпеда")

Праз нявыдачу ліцэнзіі "Крумкачам" менскае "Тарпеда" вярнулася ў вышэйшую лігу праз трынаццаць гадоў. Кабельскі прышчапіў "аўтазаводцам" модную схему з трыма цэнтральнымі абаронцамі, але асаблівых вынікаў ідэі трэнера не прынеслі. Яго папрасілі на адзнацы 12 гульняў - "чорна-белыя" знаходзіліся на дне разам з "Гомелем" і "Гарадзеяй".

На наступны матч "Тарпеда" вывеў Леанід Лагун, але і ён затрымаўся толькі на шэсць матчаў. Плюс пяць балаў, але па-ранейшаму дол табліцы.

Сягоння абодва настаўнікі знаходзяцца ў творчым пошуку.