«22 гады аддаў працы – але «кіроўная хунта» паквапілася і перастала дзяліцца»

Прафзвяз РЭП дапамог былому работніку перамагчы ў спрэчцы з установай аховы здароўя.

Суд Цэнтральнага раёна Гомеля адмовіў у пазове аб абароне бізнэс рэпутацыі гомельскай гарадской паліклініцы №1 да інжынера-праграміста Канстанціну Зянько, паведамляе "Гомельская вясна".

Пастанова суда першай інстанцыі не абскарджвалася і ўвайшла ў законнае дзеянне.

15 жніўня галоўны лекар паліклінікі №1 у Гомелі Віктар Казлоў падаў у суд пазоў аб абароне бізнэс рэпутацыі ад былога работніка паліклінікі, праграміста Канстанціна Зянько, які, на думку галоўнага лекара, «распаўсюджвае ў СМІ пра былога працадаўцу несапраўдныя звесткі, якія чыняць шкоду дзелавой рэпутацыі медыцынскай установы і фармуюць ў насельніцтва імідж нядобрасумленнага наймальніка».

Не згодны са звальненнем з працы па заканчэнню працоўнага кантракту працаўнік звяртаўся і ў прафзвяы і розныя СМІ, пры гэтым Канстанцін Зянько, заяўляючы аб маральнай беспрынцыповасці не скупіўся на моцныя выразы на адрас былога боса.

- Я 22 гады свайго жыцця аддаў працы ў паліклініцы №1. Адміністрацыя дзялілася са мной зэканомленымі фінансамі шляхам дадатковых прэмій. Але неўзабаве «вярхавіна», калі не сказаць «кіроўная хунта», паквапілася і перастала дзяліцца, а неўзабаве наогул са мной не падоўжылі кантракт, - пісаў у СМІ звольнены працаўнік.

- Хоць плач, хоць крычы - калі табе за 50, ты становішся нікому не патрэбны! Што ты ўсё жыццё аддаў працы ніхто ў разлік не бярэ, мой былы наймальнік наогул мне заявіў - я табе прычыны звальнення тлумачыць не павінен!, - падсумаваў суразмоўца.

49-гадовы Канстанцін Зянько, які перанёс інсульт, таксама заявіў, што яго «выціснулі як лімон і выкінулі на вуліцу», прычым пры звальненні яшчэ і абакралі. Так званыя «ўлюбёнцы» перасталі дзеліцца «здабычай» - маючы на ўвазе нявыплату прэміяльных заяўляў СМІ мужчына.

Юрыст Беларускай асацыяцыі журналістаў (БАЖ) Леанід Судаленка, які кансультаваў адказчыка ў судзе кажа, што ім атрымалася пераканаць суд у тым, што сваім зместам і стылем названыя вышэй выказванні маюць ацэначныя меркаванні і меркаванні аўтара на канкрэтную сітуацыю.

- Вядома, што факты і абставіны, з'яўляючыся выразам суб'ектыўнага меркавання і поглядаў, зняпраўджванню не падлягаюць. Сваім зместам і стылем ўсе распаўсюджаныя маім падабаронным звесткі належаць да публіцыстычнага жанру, які не прэтэндуе на строгі выклад падзей і фактаў. Гэтыя звесткі не з'яўляюцца сцвярджэннем, а наяўныя рытарычныя пытанні, незалежна як іх успрымае канкрэтная асоба, зняпраўджванню не падлягаюць, - дадаў юрыст.

Варта адзначыць, што БАЖ і раней атрымліваў перамогі ў судах у справах, звязаных з выказванне меркаванняў. «Абражаны» начальнік Лоеўскага РАУС саступіў у пазове журналісту-фрылансеру пра зняпраўджванне звестак і спагнанні маральнай шкоды, «абражаная» кіраўніца справамі Кастрычніцкага райвыканкама не змагла давесці факт абразы тым жа фрылансерам. З дапамогай юрыста БАЖ у судзе быў спынены адміністрацыйнае пераслед аднаго з гомельскіх блогераў, якога міліцыя спрабавала прыцягнуць да адказнасці як СМІ.