Відэафакт: У Менску BMW заняў месца тралейбуса на прыпынку

Нікому не перашкодзіў?

Нядаўна СМІ паведамлялі аб дзвюх канфліктных сітуацыях, якія адбыліся паміж аўтамабілістамі і кіроўцамі грамадскага транспарту ў Менску: у адным з выпадкаў кіроўца BMW перагарадзіў дарогу тралейбусу, у іншым - Mercedes на прыпынку грамадскага транспарту перашкодзіў аўтобусу. Вось новае відэа ад чытача onliner.by, якое дае ўяўленне пра тое, колькім людзям можа перашкодзіць аўтамабіль, які заняў прыпынак грамадскага транспарту.

Месца дзеяння: прыпынак грамадскага транспарту «Станцыя метро «Пушкінская» на праспекце Пушкіна. Інтэнсіўная транспартная плынь, вялікая колькасць грамадскага транспарту.

- Кіроўца BMW спыніўся, выйшаў з аўтамабіля і пайшоў у бок метро. Я не ведаю, як доўга яго не было. Але пакуль я спрабаваў выехаць, аўтамабіль дакладна быў на месцы, - распавёў аўтар відэа, карыстальнік нашага форуму з нікам pilya-87.89.

Чытач звярнуў увагу на тое, што BMW перашкодзіў грамадскаму транспарту.

- Кіроўцы трох тралейбусаў вымушаныя былі перабудоўвацца з першай паласы ў другую, а затым назад, каб пад'ехаць да прыпынку, - указаў pilya-87.89.

Кіроўца маршруткі не змог праехаць на прыпынак, бо ягонае месца было занятае BMW. Ён пачаў пасадку і высадку пасажыраў фактычна з другой паласы. Акрамя таго, цяжкасці ўзніклі ў кіроўцаў, якія паварочвалі направа, на праспект Пушкіна, у тым ліку і ў аўтара відэа.

Аналагічныя праблемы назіраюцца на шматлікіх прыпынках у Менску, у асаблівасці, на размешчаных на выездах з горада або паблізу станцый метро (напрыклад, «Уручча», «Каменная Горка», «Магілёўская»).

У ПДР паказана, што спыненне і стаянка транспартных сродкаў забараняюцца: на прыпыначных пунктах маршрутных транспартных сродкаў і бліжэй за 15 метраў ад іх, акрамя выпадкаў прыпынку для пасадкі (высадкі) пасажыраў, калі гэта не створыць перашкоды для руху маршрутных транспартных сродкаў (п.143.5) . А што ж рабіць тым аўтамабілістам, якім вельмі трэба?

- Я думаю, пры жаданні заўсёды можна знайсці месца, дзе можна спыніцца і нікому не перашкаджаць, - мяркуе наш чытач pilya-87.89.

А гэта фота з'явілася ў групе «Твой Менск» у vk.com.

- Кіроўца так паставіў аўто, што тралейбус не змог праехаць (не ўвайшоў у паварот), - напісаў Даня, які апублікаваў здымак.

Інцыдэнт адбыўся на бульвары Шаўчэнкі ў раёне скрыжавання з вуліцай Веры Харужай.