У эканоміцы Кітая выявілі схаваную запазычанасць на $ 5,8 трыльёнаў

Пазыковы цяжар дзяржаўнага сэктару Кітая выявіўся істотна вышэйшым за афіцыйныя лічбы.

Пра гэта папярэджвае ў аглядзе міжнароднае рэйтынгавае агенцтва S&P, піша finanz.ru.

Мясцовыя ўрады правінцый КНР назапасілі пазабалансавую завінавачанасць на суму як мінімум 40 трыльёнаў юаняў, або 5,8 трлн даляраў, што абяцае рызыкі новага дэфолту ў другой эканоміцы свету, пішуць аналітыкі S&P Global Ratings на чале з Глорыяй Лу.

"Патэнцыйныя сумы запазычанасці - гэта айсбэрг з гіганцкай крэдытнай рызыкай", - адзначае Лу.

Значная частка пазык прыпадае на спецыяльныя структуры фінансавання мясцовых органаў улады, так званыя LGFV, і гэта значыць, што расплачвацца за пазыкі неабавязкова павінны будуць самі лакальныя ўрады.

Нацыянальная эканоміка змяншае тэмпы, а устаноўленай Пекінам квоты на выданне аблігацый мясцовых урадаў не стае для фінансавання інфраструктурных праектаў, патрэбных для падтрымання росту ў рэгіёнах, і лакальныя ўлады па ўсёй краіне звяртаюцца да LGFV для залучэння сродкаў, адзначае S&P.

У выніку гэтых спецыяльным структурам даводзіцца "ісці па канаце", балансуючы паміж зніжэннем пазыковага цяжару і трансфармацыяй бізнэсу ў больш стандартныя дзяржаўныя формы, канстатуе S&P.

"Рынкі маюць рацыю, пачынаючы больш турбавацца аб устойлівасці кітайскай запазычанасці і падвышанай фінансавай рызыцы", - кажа і галоўны эканаміст Citigroup Inc. у справах КНР у Ганконгу Лю Лі-Ган.

Паводле ягоных слоў, назапашванне рызыкі абяцае новы ціск на юань, які ўжо страціў блізу 10% вартасці з пачатку года.

Крэдытныя ўліванні далей застаюцца крыніцай кітайскага "эканамічнага цуду". Па першым квартала агульная запазычанасць нефінансавага сектара КНР вырасла на 5,5 адсоткавага пункта і дасягнула чарговага рэкорднага значэння 261,2% УБП.

Галоўным назапашвальнікам запазычанасці стаў карпарацыйны сэктар (+3,8 пункта), дзяржаўная запазычанасць вырасла на 0,8 пункта, а запазычанасць хатніх гаспадарак - на 0,9 пункта, падлічыў Банк міжнародных разлікаў.

Зніжэнне запазычанасці, якое БМР фіксаваў у канцы мінулага года, чакана сталася часовым. Крэдытны цяжар працягне рост праз гандлёвую вайну з ЗША і стымуляцыйных захадаў кітайскага кіраўніцтва, сярод якіх спрашчэння доступу да крэдыту кампаніям, занятым у інфраструктурных праектах, кажа аналітык ЦМД Сбербанка Васілій Носаў.

"Хоць Сі Цзіньпін рэгулярна называе зніжэнне закрэдытаванасці эканомікі ключавой задачай, звесткі паказваюць на прыярытэт падтрымкі высокіх тэмпаў росту УБП, - адзначае ён. - Стабільны рост УБП патрэбны Кітаю для падтрымання пазітыўных настрояў інвестараў і, такім чынам, стабільнага прытоку замежных інвестыцый і замежных тэхналогій".