Бясплатная медыцына: у менчукоў 15 гадоў для праверкі сэрца патрабавалі батарэйкі

Пацыенты сутыкнуліся ў Менскім клінічным кансультацыйна-дыягнастычным цэнтры з дзіўным патрабаваннем.

Мянчук Мікіта Семяненка распавёў «Еўрарадыё» пра дзіўнае патрабаванне, з якім сутыкнуўся ў Менскім клінічным кансультацыйна-дыягнастычным цэнтры на вуліцы Сямашка, калі праходзіў медагляд для ваенкамата.

Перад абследаваннем яму ўручылі памятку, дзе пазначана, што на працэдуру Холтэр-ЭКГ пацыент павінен прыйсці са сваімі пальчыкавымі батарэйкамі і лейкапластырам на папяровай або плёначнай аснове. Журналісты разабралася ў сітуацыі і дамагліся выбачэнняў перад пацыентамі.

"Апарат даецца бясплатна, але вось сілкаванне да яго пацыент павінен прынесці сам"

"Смяхотны факт, вядома, — дзівіцца Мікіта. — Медыцына нібыта ў Беларусі бясплатная. Такія рэчы, як батарэйкі і пластыр, павінны быць у лекараў, а тут высвятляецца - нясіце самі! Выходзіць, што нават прыляпляць мяне да апарата таксама будуць за мае сродкі, нягледзячы на тое што медагляд я праходжу ад ваенкамата, дзе, па ідэі, павінны быць зацікаўленыя ў тым, каб я наведаў ўсіх лекараў і быў ваеннаабавязаны".

Трэба адзначыць, што МККДЦ па ўзроўні аказання медыцынскай дапамогі прыраўноўваецца да рэспубліканскіх навукова-практычных цэнтраў, гэта вам не якая-небудзь раённая паліклініка. Тэлефануем у кол-цэнтр медустановы.

"Я ў шоку. Вы мяне аж рассмяшылі, — адказвае спецыяліст. — На падставе якога закона і прычым тут бясплатная медыцына, я вам не скажу".

Па іншым нумары нам пацвярджаюць, што ў цэнтры даюць такія памяткі: "Так, медыцына бясплатная. Апарат пацыенту даецца бясплатны, але сілкаванне да яго ён павінен прынесці сам".

"Так працуем не толькі мы, але ніхто не скардзіцца"

У аддзяленні функцыянальнай дыягностыкі МККДЦ журналістам кажуць, што раней такіх пытанняў ад пацыентаў ніколі не было.

"Мы так працуем ужо 15 гадоў, і, хутчэй за ўсё, не толькі мы. Пытанне ўзнікла ўпершыню. Калі цэнтру самастойна закупляць батарэйкі, то спатрэбіцца мінімум дзесяць тысяч батарэек на год. Таму, магчыма, артыкула, па якім медустанова можа закупіць гэтыя батарэйкі, афіцыйна, проста няма. Гэта ж не дзесяць штук, а дзесяць тысяч. Думаю, што ўсюды, ва ўсіх паліклініках, пацыенты прыносяць батарэйкі самі".

Калі ўзяць прыкладны кошт пальчыкавай батарэйкі ў 1,5 рубля, то за год на іх за кошт пацыентаў толькі медцэнтр на Сямашкі эканоміць ад 15 тысяч рублёў.

У краіне з бясплатнай медыцынай правіла "калі няма ў саміх, забяры ў іншага", вядома, заслугоўвае ўвагі. Але няўжо ёсць дакумент, які дазваляе цэнтру патрабаваць ад пацыентаў прыносіць свае расходныя матэрыялы да медыцынскіх апаратаў?

"Такія патрабаванні незаконныя"

Юрыст МККДЦ Наталля Уласенка, даведаўшыся пра тое, што пры праходжанні медагляду ў ваенкамат ад пацыентаў патрабуюць прыйсці не з пустымі рукамі, шчыра здзівілася і папрасіла час, каб ва ўсім разабрацца.

Крыху пазней мы паразмаўлялі яшчэ раз, і яна ад медустановы выбачылася перад Мікітам і іншымі пацыентамі за тое, што ім раздавалі памяткі, нічога не тлумачачы.

"Вядома, такіх патрабаванняў быць не можа, — адзначыла спецыяліст. — І дзякуй, што вы звярнулі ўвагу на сітуацыю. Я паразмаўляла з нашымі спецыялістамі. Мы прыносім свае прабачэнні. Вядома, у медустановах павінны быць свае батарэйкі і тым больш пластыр. Папрасіць прынесці батарэйкі на ўсялякі выпадак можна, каб апарат паказаў больш дакладныя вынікі, калі вы перажываеце, што ў ім, дапусцім, не мяняюць батарэйкі пасля кожнага пацыента. Але патрабаваць гэтага нельга. Калі батарэйкі пацыент не прынясе, яго абавязаныя ўсё роўна абслужыць. Наколькі я ведаю, свае батарэйкі потым можна забраць сабе, а не пакідаць у нас".