Большасць сталічных гімназій перайшлі на графік «пад Міколку»
19- 31.08.2017, 19:48
- 22,385
29 сталічных гімназій з 50 будуць у новым навучальным годзе пачынаць заняткі а 9 ранку.
У канцы мінулага навучальнага года Міністэрства адукацыі паведаміла, што вызначаць, пачынаць заняткі з 8.00, 8.30 або 9.00, павінны на ўзроўні навучальных устаноў. Аднак некаторыя школы вызначыліся з раскладам толькі ў другой палове жніўня, піша tut.by.
Нагадаем, упершыню меркаванне пра тое, што заняткі з 8.30 трэба перанесці на 9.00, прагучала ўвосень мінулага года. Тады, выступаючы перад «дэпутатамі», дыктатар загадаў перагледзець гэтае пытанне. Крыху пазней у якасці прыкладу Лукашэнка падаў свайго сына, панаракаўшы, што ў сераду ў сына Міколы было сем урокаў, «дзіця прачынаецца а палове на сёмую...».
Правадыр даў загад міністру-камуністу Ігару Карпенку, каб першы ўрок пачынаўся а 9.00.
У канцы навучальнага года настаўнікі апыталі бацькоў, які час ім зручны, некаторыя бацькі пісалі зварот на імя адміністрацыі школ і гімназій з просьбай пакінуць ранейшы расклад - з 8.30.
У выніку кожная навучальная ўстанова самастойна пастанавіла, калі ім пачынаць першы ўрок. З 50 сталічных гімназій 29 цяпер будуць працаваць паводле новага графіку. Да прыкладу, у гімназіях №1, №3, №8, №16, №24, №50 першая змена пачынаецца з 9.00. Абедаць школьнікі будуць пасля другога ці трэцяга ўрока, перамены па 15 хвілін.
- Нулявы ўрок у дзяцей будзе пачынацца а 8.05. Гэта будзе або класная гадзіна, або факультатыў, ці платны гурток, - удакладнілі ў адной з менскіх гімназій.
У 21-й гімназіі дзеці на заняткі будуць прыходзіць а 8.30. Змены не закранулі, напрыклад, гімназій №2, №10, №23, №32, №42.
У адной з менскіх гімназій учора распавялі: дзецям абвясцілі пра тое, што ўрокі будуць з 8.30, але гэты час яшчэ ўзгадняецца з управай адукацыі.
- Мы спадзяемся, што нічога не зменіцца, - адказалі нам праз тэлефон.